Sgwrs Artist
13:00-15:00
Mae Anna Falcini yn trafod sut mae llythyrau, llyfrau nodiadau a darluniadau’r artist Gwen John wrth wraidd ei harddangosfa unigol ddiweddaraf, 'ailddychmygu Gwen John: meinwe feddal'. Arweiniodd comisiwn gan y British Council Wales yn 2024 i ddatblygu gwaith newydd am fywyd John ym Mharis at ddarganfod y bydoedd mewnol a oedd yn rhan o fywyd yr artist Cymreig ym Mharis, gan olrhain ei pherthnasoedd ysbrydol, personol ac an-ddynol.
Archwiliodd Falcini sut yr oedd rhyngwyneb bywyd artistig a phersonol John yn plethu â’r dwysedd emosiynol a brofwyd gan yr artist. Er ei bod yn aml yn cael ei hystyried yn bwnc problematig, mae Falcini yn datgelu dehongliadau newydd ac yn amlygu’r gwrthdaro emosiynol hwn a oedd yn bodoli ochr yn ochr â bywyd artistig John.
Yn y sgwrs, bydd yr artist yn archwilio’r hyn sy’n ysgogi safbwyntiau newydd ar yr agwedd hon o fywyd John, safbwyntiau sy’n codi trwy ddefnyddio deunyddiau bregus fel porslen a ffabrig, natur ysgafn ac addurnol rhuban gwallt coch llachar, neu’r weithred o ofalu am gorff menyw wrth frwsio gwallt – elfennau sy’n cael eu cyflwyno trwy gerflunwaith, perfformiad, gosodiad celf a darluniadau dyfrlliw.
Perfformiad 'Cath neu Fenyw - mater o gyfrolau'
15:30-16:30
Mae Anna Falcini yn cyflwyno gwaith perfformio hirhoedlog sy’n ail-greu agweddau allweddol ar fywyd yr artist o Gymru, Gwen John (1876–1939). Drwy archwilio sut y llwyddai John i symud rhwng arferion benywaidd a domestig ei bywyd bob dydd, gan hefyd ymgymryd â gweithredoedd mwy mentrus, megis cerdded a chysgu ar ei phen ei hun yng Nghoedwig Meudon wrth chwilio am ei chathod coll, daw ei chymeriad annibynnol i’r amlwg, ynghyd â’r modd yr heriai ddisgwyliadau cymdeithas o fenywod ar ddechrau’r 20fed ganrif.
Mae’r perfformiad yn dechrau yn ardaloedd coediog awyr agored Plas Glyn-y-Weddw, wrth i Falcini symud drwy’r gofod gan ddefnyddio ystumiau tebyg i gath, gan archwilio gallu’r gath i groesi ffiniau a symud ble bynnag y myn, gan ddibynnu ar ei greddf a’i hymddygiad naturiol. Wrth ymgorffori corff y gath, mae symudiadau’r artist yn datblygu o amgylch cynffon y gath, sy’n ganolbwynt pwysig ar gyfer cydbwysedd a symudiad, ac yn amlygu’r gwahaniaeth rhwng annibyniaeth y gath a chyfyngiadau’r corff dynol.
Wrth i Falcini fynd i mewn i adeilad Gothig trawiadol y Plas, mae’r artist yn dychwelyd at arferion benywaidd John. Mae’r gweithredoedd hyn o ofalu am y corff yn canolbwyntio’n benodol ar frwsio ei gwallt, gan droi’n weithredoedd o hunanofal a thynerwch, yn hytrach na mynegiadau o harddwch confensiynol neu baratoi ar gyfer syllu pobl eraill. Mae Falcini wedyn yn troi at ei hanghenion personol ei hun am hunanofal a meithrin ei chorff, gan herio’r naratifau hanesyddol sy’n disgwyl i fenywod roi eraill o flaen eu hanghenion eu hunain. Fel rhan o’r perfformiad, bydd yn gwisgo clogyn glas amddiffynnol ar adegau ac yn cropian i lawr y grisiau, mewn gweithred olaf sy’n cyfleu bregusrwydd a’r bygythiad parhaus sy’n wynebu safle menywod mewn cymdeithas.
Mynediad am ddim!
